Ginhugasan kag ginhalukan ni Pope Leo XIV ang tiil sang 12 ka mga pari sa Roma bilang kabahin sang espesyal nga ritwal nagapakita sang pagkamapainubuson ni Hesukristo sa gab-i antes ang iya kamatayon.
Ginhiwat ang espesyal nga ritwal sa Basilica of St. John Lateran nga amo ang cathedral church sang Santo Papa.
Naglain ini sa kinaandan nga tradisyon.
Kun matandaan, ginpili anay ni Pope Francis nga patigayunon ang service sa gwa sang mga simbahan, kaangay sang mga presuhan kag puluy-an sang mga tigulang kaangay sang iya ginahimo sang yara pa ini sa Argentina.
Sang nagligad nga tuig, apisar maluya na bangud sa double pneumonia kag inadlaw antes ang iya kamatayon, nagkadto pa si Pope Francis sa Regina Coeli sa Roma nga isa sa pinakamagutok nga presuhan sa Italya.
Subong nga tuig, suno sa Vatican officials, ginpili ni Pope Leo nga hugasan ang tiil sang mga pari bilang suporta sa Catholic clergy nga nagatrabaho sang malawig nga inoras kag nagapanguna sa masobra isa ka parokya.
Sa iya monthly prayer intention subong nga Abril, gindedikar man ini ni Pope sa mga pari, kag ginhingyo sa mga Katoliko sa bilog nga kalibutan nga ipangamuyo sa Ginuo nga tatapon sila.
Sa iya mensahe kadungan sang Huwebes Santo, nagpahayag si Pope Leo nga ang akto ni Hesus dapat magserbe nga inspirasyon para sa mga tumuluo nga magtatap para sa mga nagakinahanglan.
“As humanity is brought to its knees by so many acts of brutality, let us too kneel down as brothers and sisters alongside the oppressed,” suno sa Santo Papa. “God has given us an example — not of how to dominate, but of how to liberate,” dugang sini.#
