ILOILO CITY – Nagpasalig si President Ferdinand Marcos Jr. nga unahon niya ang kaayuhan sang mga overseas Filipino workers sa Malaysia kadungan sang iya state visit sa nasambit nga pungsod.
Sa pag-abot ni Marcos sa Kuala Lumpur, gin-una niya ang pagpakigkita sa mga Filipino.
Sa iya speech, ginpahayag niya nga madamo sang mga Pilipino sa Malaysia gani, kinahanglan nga pabaskugon ang relasyon sang Pilipinas sa amo nga pungsod.
Suno sa Philippine Embassy sa Kuala Lumpur, halos isa ka milyon ang populasyon sang Filipino sa Malaysia kun sa diin, ang kalabanan sa ila ang mga trabahante.
Pahayag ni Marcos, obligasyon sang gobyerno nga mapasiguro nga ang interes sang mga Filipino sa Malaysia ang mahatagan sang proteksyon kag ang mga issues kag mga pagtilaw nga ginapangatubang ang dapat nga ma-address.
Gindayaw man niya ang mga Filipino bangud sa pag-promote sang maayo nga relasyon sa iban nga pungsod kag sa pagpabilin sang maayo nga reputasyon sang Pilipinas sa gwa sang pungsod.
“Kaya naman kailangan talaga kayong pasalamatan, dahil ang naging reputasyon ng Pilipinas ay gumanda nang gumanda dahil sa performance na ginagawa ninyo at inyong pinapakita sa mga taga-rito. Sa mga taga-Malaysia, kung saan man, taga-Middle East, kung saan sila, taga-Europe, sa America. Pare-pareho,” pahayag niya.
Nahibaluan nga nag-abot si Marcos sa Kua Lumpur para sa tatlo ka adlaw nga state visit kun sa diin, ginaluaman nga masapol niya si Malaysian King Sultan Abdullah Sultan Ahmad Shah kag iban pa nga government officials kag business leaders.
Ang Malaysia ang ika-10 nga pinakadako nga trading partner sang Pilipinas kag ika-22 nga source sang approved investments sang nagligad nga tuig suno sa Department of Foreign Affairs.
Sang Marso, nagbisita sa Pilipinas si Malaysian Prime Minister Anwar Ibrahim kag nagpasalig kay Marcos nga pabaskugon pa ang security, trade kag investment cooperation.
