ILOILO CITY- Pormal na nga ginbuksan ni President Ferdinand R. Marcos Jr. ang 18th National Scout Jamboree sa Pintados de Passi Camp sa Passi City subong nga adlaw.
Sang Marso subong nga tuig sang gin-anunsiyo sang Boy Scouts of the Philippines pinaagi sa National Office Memorandum No. 24, series of 2023 ang pagpatigayon sang national event nga magasugod subong nga adlaw kag magatakop sa Disyembre 17.
Ang okasyon ang nagakatabo sa tagsa ka apat ka tuig, kag subong, nagtipon ang ginabanta 34, 000 nga mga crowd nga ginabug-usan sang local kag international scouts kag scoutmasters, national kag local officials, kag iban pa nga imbitado nga mga bisita.
Sa nangin mensahe sang presidente, ginpahayag sini nga nalipay siya nga liwat siya nga nakatambong sang amo nga aktibidad.
Pahayag niya, ang ini nga aktibidad ang nagapahanumdom indi lamang sang importansya sang scouting kundi, ang legasiya nga nahatag sini sa pungsod.
Dugang pa niya, ini ang kahiwatan nga nagapakita sang camaraderie kag leadership sa mga pamatan-on.
Sa amo man nga kahiwatan, ginpatigayon man ang investiture ceremony kun sa diin gin-install si Marcos bilang Chief Boy Scout of the Philippines.
