ILOILO CITY – Nagmandu si President Ferdinand Marcos Jr. sa mga concerned agencies nga unahon ang pagtukod liwat sang mga eskwelahan kag ospital nga naguba bangud sang mabaskog nga linog nga nagtay-og sa pila ka bahin sang Mindanao sang nagligad nga semana.
Ini ang ginpahayag ni Marcos sa situation briefing upod ang local kag national officials sa General Santos City nga isa sa mga hard-hit areas sang magnitude 6.8 nga linog.
Personal niya nga ginbisitahan ang lugar agud nga ma-monitor ang sitwasyon sang mga biktima sang linog.
Ginabanta 20 ka mga public schools kag 78 ka mga classrooms ang apektado sang linog sa Sarangani province samtang 32 naman ka mga eskwelahan ang naguba sa General Santos City.
Ang tanan nga pampubliko nga eskwelahan ang nagapabilin nga operational apang magapatigayon sang assessment agud nga matumod ang integridad sang mga buildings.
Nahibaluan nga siyam ka mga tawo ang napatay suno sa National Disaster Risk Reduction and Management Council.
Lima diri ang gin-report sa Sarangani, tatlo sa South Cotabato, kag isa sa Davao Occidental.
Napilasan naman ang 30 ka mga indibidwal.
Samtang, ginmanduan man ni Marcos ang Department of Public Works and Highways nga i-assess ang damage sa mga major government infrastructure kaangay sang dalan kag mga taytay.
Ginmanduan man ang Philippine Ports Authority nga tsekyaron ang damage sa mga seaports.
Una na nga ginpaidalom sa state of calamity ang Glan sa Sarangani.
Sa pinakaulihi nga datos, masobra sa 20, 000 ka mga pamilya ang apektado sang linog kag ginabanta 3, 000 ka mga panimalay ang nagkalaguba.
