ILOILO CITY – Nagmandu na si President Ferdinand Marcos Jr. nga magtukod sang isa ka inter-agency task force agud nga magpasiguro sang kalinong kag katawhay sa Negros Island.
Base sa Administrative Order No. 6 nga pirmado sang Abril 3, ang mga government agencies concerned ang dapat nga magpasiguro nga mauntat na ang paglapta kag pagdamo sang kinagamo sa diin man nga bahin sang Pilipinas kag ipabilin ang kalinong sa Negros Island.
Ginmanduan man ang mga ahensya nga pabaskugon pa ang kampanya batuk sa private armed groups kag loose firearms.
Ang pangalan sang task force ang ginkuha kay late Negros Oriental Gov. Roel Degamo.
Ang Task Force Degamo ang pamunuan ni Interior and Local Government Secretary Benhur Abalos samtang ang co-chairman amo sanday Justice Chief Jesus Crispin Remulla kag National Defense Secretary Carlito Galvez Jr.
Ang mga task force commanders ang ginalakipan nanday Philippine National Police Chief General Rodolfo Azurin Jr., Armed Forces of the Philippines Chief-of-staff General Andres Centino, kag National Bureau of Investigation Director Medardo De Lemos.
Samtang, ang Department of Social Welfare and Development ang ginmanduan nga maghatag sang emergency relief assistance sa pamilya sang mga biktima kag ang Department of Health ang dapat nga maghatag sang psychological rehabilitation sa apektado nga mga indibidwal.
Ginmanduan man ang Presidential Assistant for the Visayas nga magpakig-angut sa task force.
Sa idalom sang Administrative Order No. 6, ang task force ang may gahum nga mag-coordinate kag mag-rationalize sang mga tikang sang mga ahensya sang gobyerno agud nga mapasiguro ang whole-of-government approach sa pagtapna, pag-imbestogar, prosecution kag pagpina sa mga responsable sa pagpanggamo sa Negros Island.
