Ginaduso sang Police Regional Office 6 ang pagpagamit sa mga estudyante sang Transparent bags sa Western Visayas.
Suno kay PBGen. Randulf Tuaño, Regional Director sang PRO6, iya ginpahayag nga nagapadayun pa ang ila koordinasyon sa Department of Education-6 ilabi na nga makabulig gid ini para sa practical safety measures kag para sa kalinungan man sang mga buluthuan.
Kasunod ini sang ginpatigayon nga pagsinapol sang PRO6 kaupod ang Iloilo City Police Office (ICPO) kag Iloilo City Schools Division Office kahapon nga adlaw kag bangud man sang madamo nga mga school incidents sa Pilipinas kun sa diin mismo nga mga estudyante ang involved.
Nagapati man si Tuaño nga mangin dako nga bulig para sa school kag security personnel ang paggamit sang transparent bags agud indi man sila mabudlayan sa paglantaw sa mga dala nga gamit sang mga kabataan.
Paathag pa sang Regional Director, isa pa lamang ini ka proposal, kag indi pa mapatuman samtang indi pa aprubado sang Department of Education.
