Nagpasalig ang Police Regional Office VI (PRO-6) nga pasangkaron pa sang mga kapulisan ang ila nga pagbantay sa mga pantalan, paluparan, kag terminal sa Western Visayas.
Sa interview sang Bombo Radyo kay Police Lieutenant Colonel Arnel Solis, spokesperson sang Police Regional Office VI, iya ginpahayag nga padayon ang ila koordinasyon Philippine Coast Guard (PCG) kag pila ka ahensya sang gobyerno agud nga hugot nga mabantayan ang mga entry points sang rehiyon.
Partikular na sa mga masako nga pantalan sa rehiyon kapareho sang Caticlan Port, Culasi Port, Dumangas Ports, kag Fort San Pedro.
Suno kay Solis, may ginpatuman na man nga mga tikang para sa inbound kag outbound passengers kag cargos kun sa diin ginapaidalom sa X-Ray, deployment sang K9 units, kag pag-bantay sang katapo sang PCG.
Kon balikan, nakumpiskar ang P816 million nga iligal nga droga sa Calapan Port nga dal-on kuntani sa Iloilo City.
Gindayaw na man sang PRO-6 ang madinalag-on nga operasyon sang kapulisan batok sa iligal nga druga sa Oriental Mindoro.
