ILOILO CITY – Padayon nga nagalapad ang nagaluntad nga wildfire sa probinsya sang Alberta sa Canada kun sa diin napaidalom ini sa state of emergency sa sulod na sang masobra duha ka semana humalin sang Mayo 4.
Sa subong, masobra sa 780,000 ka ektarya sang duta kag kagulangan ang nasunog.
Suno kay Bombo Valen Jude Jambaro, international correspondent direkta sa Canada, lima ka tuig na ang nagligad sang ulihi nga naekspeyensyahan ang wildfire, apang wala ini nagalapaw sa 800 ka ektarya, kun ipaangid sa wildfire subong.
Ginpahayag dugang sang natungdan nga tuman ka apektado ang First Nations communities kaangay sang Edmonton, Calgary, Drayton Valley, Edson kag Grande Prairie.
Sa subong suno kay Jambaro, naglab-ot na ang sunog sa borders sang mga syudad sa naaminhan kag nabagatnan nga bahin sang Amerika kaangay sang Northwest Rockies, Northern Plains, the Great Lakes, Mississippi Valley, kag Denver.
As of press time, nakig-angot na ang gobyerno sang Alberta sa iban nga mga pungsod kaangay sang United States, Mexico, Australia kag New Zealand para sa dugang nga bulig.
Kaangot diri, naghingyo man ang Alberta sang dugang nga mga tawo nga may firefighting experience agud mag-volunteer sa pagpalong sang kalayo sa diin may yara sang 2,800 ka mga firefighters ang nagaresponde subong.
Sa tunga sang emerhensya, nagpanagtag man ang government of Alberta sang emergency funds kun sa diin magabaton ang mga tigulang sang $1,250 ukon P69,561.25 bilang dugang nga pondo, pananglitan nga may yara sang ginaatipan nga bata nga naga-edad sang 18-anyos panubo.
