Gintalana na sa Mayo 6 ang public hearing kaangot sa maka-alarma nga isyu sa power supply sa pungsod nga rason sang pagdoble sa balayran sa kuryente kadungan sang pagbatak sang red kag yellow alerts.
Si Senator Raffy Tulfo nga amo ang chairman sang Senate Committee on Enery amo mismo ang nagduso sang Resolution No. 1008 kasunod sang sunod-sunod nga deklarasyon sang red kag yellow alerts sa Luzon, Visayas, kag pati sa Mindanao.
Sandig sa data sang Independent Electricity Market Operator of the Philippines, ang pagbutang sang Luzon kag Visayas grids sa yellow kag red alerts ang nagtuga sang pagsaka sa electricity market prices.
Suno kay Tulfo, ang kakulang sa power supply ang nagpasaka sang balayran sang kuryente sa Luzon sang P13.39 pesos per kilowatt hour halin sa P5.55 per kwh.
Sa Visayas, nagsaka man ang power rates sa market halin sa P5.73 per kwh tubtub sa P14.64 per kwh.
Magluwas kay Tulfo, una naman nga ginkwestyon nanday Senators Risa Hontiveros, Sherwin Gatchalian, kag Francis Escudero ang indi rasonable nga power outages kag mas mataas nga electric bills nga kadungan sang red kag yellow alert status.
