ILOILO CITY – Ipatawag ni Iloilo City Councilor Ely Estante ang tanan nga concerned parties agud istoryahan ang reklamo sang mga fish vendors sa mga merkado publiko sa syudad batok sa mga naga-retail sang isda sa sulod mismo sang Iloilo Fishing Port rason nga diutay nalang ang nagabakal sa mga merkado publiko.
Sa interview sang Bombo Radyo kay Iloilo City Councilor Ely Estante, chairman sang Committee on Market and Slaughterhouse sa City Council, iya ginpahayag nga sapulon niya ang manager sang Fishing port, mga fish brokers, mga asosasyon sang mga fish vendors, kag mga opisyal sang Barangay Tanza Baybay, Iloilo City Proper sa diin nahamtang ang Fishing port.
Suno kay Estante, ini agud maistoryahan kag masolusyunan ang problema sang mga vendors.
Ginpahayag man niya nga katuyuan man sang pagsinapol ang posibilidad nga ma-regulate ang baligyaanay sang isda ilabi na nga sakop sang syudad sang Iloilo ang Fishing port.
