Handa na ang House prosecution panel sa pagpresentar sang mga ebidensiya may kaangtanan sa kontrobersyal nga P612.5 milyon nga confidential funds ni Vice President Sara Duterte.
Ini na ang mangin sentro sang pagbalik sang impeachment trial sa Senado subong nga Myerkules, Hulyo 29.
Suno kay Representative Joel Chua nga amo ang House prosecutor nga naga-uyat sang first article of impeachment, iplastar na sa impeachment court ang mga dokumento, mga testigo kag iban pa nga ebidensiya agud makita sang publiko ang basehan sang principal charges batok sa bise presidente.
“This is where the truth comes out. This is not just a matter of mere allegations. We will present the documents, the witnesses, and the evidence before the impeachment court,” suno kay Chua.
Ang una nga article naga-akusar kay Duterte sang misuse ukon indi-nagakaigu nga paggamit sang confidential funds samtang nagaserbe bilang bise presidente kag tiglikom sang Department of Education.
Lakip sa una nga mga testigo ang duha ka anay branch managers sang Land Bank of the Philippines, nga magahatag sang testimoniya kaangot sa pagproseso, dokumentasyon, kag pag-withdraw sang nasambit nga pondo.
Ini amo sanday Violeta Constantin halin sa Shaw Boulevard branch kag Nenita Camposano nga halin naman sa DepEd branch.
Si Chua amo man ang nangin chairman sang House Committee on Good Government and Public Accountability nga nagpatigayon sang imbestigasyon sa confidential funds ni Duterte sang 2024.
Didto nga komitiba nabulgar ang mga iregularidad sa acknowledgment receipts kaangay sang mga pangalan nga wala sang identity sa government records kaangay kay “Mary Grace Piattos.”
“We conducted a thorough investigation. Now, we’re going to lay before the impeachment court the evidence we have gathered, and we will let the truth speak for itself,” pahayag pa ni Chua.
Maga-resume ang impeachment trial 10:00 subong nga aga kag ginabanta nga magalawig 3:00 karon sa hapon. Bag-o ini nga schedule matapos ang nakaandan nga pag-umpisa sa 2:00 sa hapon sang nagligad nga mga sinemana sang ginatutukan pa sang proceedings ang akusasyon sang grave threats.#
