Nabaton na sang Senate Impeachment Court ang manifestation sang House prosecution panel nga nagapasugot ini sa article-by-article nga presentasyon sang ebidensiya sa impeachment trial.
Sa sini nga pamaagi, una nga ipresentar sang prosecution ang ebidensiya para sa isa ka article of impeachment, kag magasabat dayon ang depensa antes magpadayon sa masunod naman nga article.
Suno kay Impeachment Court spokesperson Atty. Reginald Tongol, tubtob subong wala pa sang pormal nga manifestation halin sa kampo sang respondent kon nagasugot man sila sa sini nga arrangement.
“They [prosecutors] have agreed on an article per article basis. Prosecution, and then defense, then we move on to the next article,” suno kay Tongol. “However, as to the defense, we have not received a formal manifestation from the respondent on that matter.”
Ang sabat sang defense team ang posible nga makaapekto sa proceedings subong nga adlaw, Hulyo 29.
Pahayag sini, kun magpasugot man ang defense, sila anay ang magapresentar sang ila nga ebidensya sa Article IV ukon ang akusasyon sang grave threat.
Buot silingon, posible nga indi anay magpresentar ang prosekusyon sang Article I ukon ang masunod nga article of impeachment nga naka-sentro sa confidential funds.
Ginsiling man ni Tongol nga bisan pa mabag-o ang format sang presentasyon sang ebidensiya, kinahanglan gihapon matapos ang tanan nga articles of impeachment antes makaboto ang mga senator-judges sa tagsa ka article kag sa pinal nga desisyon sang kaso.#
