ILOILO CITY- Wala gihapon marecover ang motorsiklo nga ginapanag-iyahan sang punong barangay sa Pototan, Iloilo kag ginaalegar nga gintaban sang isa ka pulis.

Screenshot sang CCTV footage nga nagapakita sang pagkawat sang pulis sa motorsiklo

Ang ginatudlo nga suspek amo si Police Corporal Darryl Dumaraog nga assigned sa Regional Mobile Force Battalion, samtang ang tagreklamo naman amo si Punong Barangay Nicky Pescuela sang Lopez Jaena Ward, Pototan.

Suspek nga si Police Corporal Darry Dumaraog sa sulod sang selda sang Pototan PNP

Sa interview sang Bombo Radyo kay Punong Barangay Pescuela, iya ginpahayag nga positibo gid niya nga na-identify ang pulis nga amo ang nagkuha sang iya motorsiklo samtang naga-park sa kilid sang plaza sang Pototan, base man sa mga footages sa close circuit television camera.

Apang suno kay Pescuela, hugot gihapon nga nagapanginwala ang pulis nga siya ang nagkawat sang motor.

Nakahunong subong si Dumaraog sa police station kag magapangatubang sang kaso kriminal kag administratibo.

Ginapahayag nga may problema-pinansyal ang pulis kag madamo sang utang kag wala na sang sarang ibakal sang iya personal nga kinahanglanon.