ILOILO CITY- Ginpa- Bombo sang isa ka pumuluyo ang punong barangay kag staff sang barangay hall sang Loboc, Lapuz bangud sa ginaalegar indi pag-isyu sa iya sang barangay clearance.
Sa interview sang Bombo Radyo sa tagreklamo nga si Joan Baylon sang Villa San Lorenzo, Loboc, Lapuz, iya ginpahayag nga ginapabalik- balik lamang siya sa barangay hall apang wala gid siya gin-isyuhan sang clearance nga gamiton niya kuntani sa iya loan application.
Suno kay Baylon, kaangay nga ginhungod ni Punong Barangay Esperidion “Pancho” Vijuan ang indi paghatag sang clearance sa iya bangud nga ang ginsuportahan niya nga kandidato sa pagka-punong barangay amo ang napierde nga si Jojo Javellana.
Nagpaathag naman si Punong Barangay Vijuan kag ginsiling nga may yara sang pending complaint sa La Paz Police station batok kay Baylon nga gin-file sang iya man lang tupadbalay.
Suno kay Vjiuan, kinahanglan anay ma-settle ini ni Baylon antes siya ma-isyuhan sang barangay clearance.
Sang ulihi, nahitso man ni Vijuan ang reklamo matapos napahangop niya ini kay Baylon.
