ILOILO CITY – Nagpa-Bombo ang isa ka pumuluyo sang Brgy. San Nicholas, Lapaz, Iloilo City matapos ginbalibaran sang ila Punong Barangay nga hulamon ang barangay patrol agud sugaton kun tani ang iya amay nga yara sa hospital.
Sa interview sang Bombo Radyo kay Almie Rose Cabiluda, ang tagreklamo, iya ginpahayag nga nagpadulong siya sa barangay hall agud maghingyo kun tani kay Punong Barangay Nelia Quintipan nga hulamon ang patrol bangud man sang masakyan ang iya amay nga bag-o lang nakaguwa sa hospital.
Suno kay Cabiluda, wala siya ginpahulam ni Quintipan sang patrol bangud suno sa Punong Barangay, gamiton ang salakyan sa pagpanghatag sang relief goods.
Magluwas diri, ginpahayag man sang tagreklamo nga ginhambalan pa siya sang malain nga tinaga sang punong barangay.
Suno naman kay Punong Barangay Nelia Quintipan, nagapamutos sila sang food packs sang nagpadulong si Cabiluda sa ila barangay hall agud maghulam sang barangay patrol.
Gin-ako ni Quintipan nga nagpamalibad siya kay Cabiluda bangud gamiton ang patrol agud magkuha kun tani sang relief goods nga gikan sa Iloilo City Government kag ipanghatag sa mga pumuluyo.
Ginpahayag man ni Quintipan nga nagpamalibad siya bangud indi man emergency ang pagagamitan ni Cabiluda kag mas importante nga makuha ang relief goods.
Ginpanginwala naman sang punong barangay nga ginhambalan niya sang malain nga tinaga ang tagreklamo.
