Nagahingyo si Punong Barangay Felicitas Hortillosa sang Barangay San Isidro, La Paz, sang dugang nga magabantay nga police personnel sa ila lugar matapos ang nagluntad nga stabbing incident sang nagligad nga Marso 21, kun sa diin apat ang patay sa inaway sa tunga sang pamilya Muya kag pamilya Provido.
Sa interview sang Bombo Radyo kay Hortillosa, iya ginpahayag nga nagakabalaka gid sila sa posibilidad nga liwat nga magluntad ang komosyon sa ila barangay, apisar nga wala naman sang baslanay nga natabo matapos ang pagbinun-anay sang duha ka pamilya.
Suno sa iya, nagpadala man siya sang request letter kay Iloilo City Mayor Raisa Treñas agud nga mabuligan sila nga i-endorso sa Iloilo City Police Office kag La Paz PNP agud nga mabantayan gid ang lugar ilabi na kun mahaya na ang mga bangkay sang nagtaliwan nga myembro sang Pamilya Muya.
Nahibaluan nga igahaya naman ang tatlo ka mga napatay nga myembro sang Pamilya Provido sa Brgy. Lanit, Jaro, agud nga malikaw sa gamo ang tagsa ka pamilya.
Kabahin man sang tikang nga mangin mahilway ang barangay amo ang paglikaw anay sang mga residente nga mag-inom-inom sa higad sang dalan kun sa diin may magalibot man nga mga tanod agud nga masiguro nga wala sang magpasaway nga mga residente.
