Rep. Defensor, ‘yes’ sa pagpasaka sang authorized election campaign expenses sang nat’l, local candidates

ILOILO – Nagalaum si Iloilo Third District Representative Lorenz “Nonoy” Defensor nga mangin mas hayag na ang mga kandidato sa Pilipinas sa pagdeklarar sang ila gasto may kaangtanan sa election.

Ini ang rason kun ngaa “YES” ang iya nangin boto sa bag-o gid lamang ginpasar nga House Bill No. 6095 ukon pagpasaka sang authorized election campaign expenses sang mga kandidato sa local kag national posts.

Sa amo nga hagna, nakasaad nga halin sa P10, pasakaan sa P50 ang election spending per voter para sa national candidate; samtang, halin sa P3, pasakaan naman sa P30 ang gastuhon per voter sa local candidate.

Sa interview sang Bombo Radyo kay Defensor, iya ginpahayag nga paagi sa gin-aprubahan nga hagna sa Kongreso, mas makit-an sang publiko kun pila gid ang ginagasto sang isa ka kandidato sa campaign period.

Suno pa sa mamalidha, indi na kinahanglan nga magbutig ang kandidato agud lamang malikawan nga mapapanaug sa pwesto kun maglapaw ang election-related expenses sa spending cap nga yara sa layi.