ILOILO CITY- Nalab-ot na sang Jalaur River Multi-Purpose Project Stage II ang target nga kataason sang reservoir dam.
Sa interview sang Bombo Radyo kay Steve Cordero, spokesperson sang Jalaur River Multi-Purpose Project Stage II, iya ginpahayag nga ginakabig nila nga milestone ang pagkompleto na sang 109 metros kataas ukon elevation nga 194 meters above sea level sang struktura.
Suno kay Cordero, sang Nobyembre 27, 2023 sang ang Project Management Office (PMO) sang National Irrigation Administration Jalaur River Multi-Purpose Project Stage II (JRMP II) kaupod ang international contractor nga Daewoo E&C ang nagpatigayon sang final batch sang concrete pouring sa high dam spillway bridge nga indikasyon nga makabig na nga kompleto ang amo nga porsyon sang proyekto.
Pahayag ni Cordero, sa sini nga development, ang nabilin na lang nga mga aktibidad sa dam sites ang nagalakip sang reservoir preparation, tunnel plugging, preparasyon sang stilling basin kag electromechanical works para sa operation phase.
Una na nakompleto ang Afterbay Dam sang Pebrero samtang ang Alibunan Catch Dam ang natapos na sang Disyembre 2021.
Ang nabilin nga mayor nga construction activities ang nasentro sa irrigation component nga nagasakop sang 80-kilometer High Line Canal kag dugang nga 80-kilometer Main kag Lateral Canals.
Ang high dam ang sarang maka-store sang 250 million cubic meters sang tubig samtang ang reservoir dam naman ang maka- generate sang eco-tourism opportunities kag makahagan- hagan sang baha sa Calinog kag kaiping nga mga banwa.
