Gin-file ni Senator Joel Villanueva ang resolution nga nagapanawagan sa gobyerno nga himuon ang tanan nga legal kag diplomatic countermeasures batok sa China sa tunga sang nagasaka nga tensyon sa West Philippine Sea.
Nakabutang sa Senate Resolution No. 980 nga dapat nga maghulag ang tanan nga nagakaigu nga ahensya kag maghimo sang mga mekanismo kag diplomatiko nga mga tikang agud tapuson na ang iligal nga aktibidad sang China sa West Philippine Sea agud nga proteksyonan man ang mga pumuluyong Pilipinhon kag ang teritoryo sang Pilipinas.
Ginkondenar man sa resolution ang padayon nga pagpang-harass sang China.
Marso 23 sang naggamit liwat ang China Coast Guard sang water cannon kag ginbombahan sang tubig ang tropa sang Pilipinas nga pakadto kuntani sa BRP Sierra Madre sa Ayungin Shoal. Bangud sang hitabo, naguba ang resupply boat sang Navy kag napilasan man ang tatlo ka mga personnel.
May isa pa ka insidente sang amo man nga adlaw malapit sa Pag-Asa island kun sa diin tuman ka lapit ang lupad sang Chinese helicopter rason nga napuhag ang grupo sang Filipino scientists kag isa ang diutayan lang nga nalumos.
Sang Agusto sang nagligad nga tuig, nag-adoptar man ang Senado sang resolution nga naga-kondena sa harassment sang Beijing sa mga manugpangisda nga Pinoy.
Matandaan nga sang 2016, mismo ang international arbitration tribunal sa The Hague ang nagsiling nga wala sang legal nga basehan ang pag-claim sang China sa West Philippine Sea apang wala man ginakilala sang Chinese government ini nga desisyon.#
