ILOILO CITY – Mas naganubo pa gid ang edad sang mga kabataan nga nagabusong sa Western Visayas.
Santo sa 2019 nga record sang Commission on Population and Development Region VI, sa 105,225 ka mga nagbusong sa amo nga tuig, 9.2% ang na-belong sa adolescent age ukon mga naga-edad 10-19 anyos.
Sa interview sang Bombo Radyo kay Regional Director Harold Alfred Marshal, iya ginpahayag nga tatlo sa sini nga mga kaso ang naga-involve sang 12 anyos nga mga babaye.
Sang una suno kay Marshal, 15-19 anyos lang nga mga kabataan ang ila gintutukan sa ila nga kampanya batok sa unwanted pregnancy apang subong, ginadala man ang mga naga-edad 10 anyos tubtob 14 anyos agud indi madugangan ang makaalarma nga kaso sang teenage pregnancy.
Sa pagkamatuod suno kay Marshal, may ara sang 9 ka tuig nga bata nga nagbusong apang wala lang sang proper record sa otoridad bangud nahamtang ang ila nga balay sa nabaw-ing nga lugar.
Wala direkta nga ginaangot ini nga mga kaso sa selebrasyon sang Valentine’s Day. Apang suno kay Marshal, daku nga factor ang pagbarkada sang mga kabataan, mga impormasyon nga makit-an sa nanuhay-tuhay nga social media platforms, kag impluwensya sang mga tawo sa palibot.
Curious kag adventurous ang mga kabataan suno kay Marshal kag kun dugangan pa sang balatyagon nga luyag gid nila ma-belong sa kultura sang ila barkada, nagasulod na ang iresponsable nga mga aktibidad kaangay sang pagpakighilawas.
Subong nga Valentine’s Day, mas matunog ang panawagan sang Commission on Population and Development Region VI nga ang ideya sang Valentine’s Day ang indi limitado sa pagpakighilawas.
Madamo sang options suno kay Marshal agud nga i-selebrar ini nga adlaw. “Parte ini siya sang respeto sa imo partner kag sa imo kaugalingon. You respect yourself. Ang ginatawag naton bala nga self-worth kag value. Amo man ina ang ihatag mo sa partner mo. Mas manami gid kun ang ginatindugan sang sina nga paghigugma is respeto. Palanggaa ang kaugalingon mo, palanggaa ang partner mo. Respestuhay lang kamo,” pahayag ni Marshal.
