ILOILO CITY – Pito ka igo sang bala ang ginkamatay sang isa ka drug personality nga ginapahayag nagbato sa buybust operation sa Mandurriao, Iloilo City.
Nahibalu-an nga sa buy bust operation nga ginpatigayon sang City Drug Enforcement Unit (CDEU) kag Mandurriao PNP, patay ang drug personality nga si Giovanni Guancia Mejica, 37, sang Block 10, Lot 5, Imperial 6, Mandurriao, Iloilo City.
Sa interview sang Bombo Radyo kay Dr. Owen Lebaquin, anay Regional Chief sang Crime Laboratory kag medico legal officer sang Police Regional Office (PRO) 6, iya ginpahayag nga si Mejica ang may igo sa sag-ang, tangkugo, dughan, abaga kag tatlo sa kamot.
Ginpahayag ni Dr. Lebaquin nga lunsay patal ang pilas ni Mejica kag imposible nga matabangan pa.
Magluwas sa pito ka igo sang bala, natukiban man sa autopsy examination sa bangkay nga may yara sang ‘tattooing’ sa lawas ni Mejica nga patimaan suno kay Dr. Lebaquin nga malapit ang pagkaluthang sa drug personality.
Mahimo suno sa natungdan nga indi magsobra sa tatlo ka tapak ang distansya sang pagkaluthang kay Mejica.
Una na nga ginpahayag ni Police Major Marlon Valencia, hepe ang Mandurriao Police Station, nga una nga nagpalupok sang armas si Mejica rason nga napilitan ang otoridad nga magbalos.
