Gin-suportahan ni United States President Joe Biden ang pahayag sang Israel nga indi sila ang sa likod sang rocket strike sa ospital sa Gaza nga nagpatay sang 471 ka mga tawo.
Kadungan ini sang iya nga solidarity visit sa Israel agud magpakita sang suporta kay Prime Minister Benjamin Netanyahu kag sa bug-os nga pungsod sa tunga sang gyera sini batok sa Hamas militants.
Nagasumpakilay ang mga pahayag kun sin-o ang responsable sa amo nga pag-atake sa Al-Ahli Baptist Hospital sa Gaza nga amo ang rason sang pag-ibwal sang kaakig indi lamang sang mga taga-Middle East kundi sang North Africa kag iban pa nga mga pungsod.
Photo: President Joe Biden/Facebook
Madasig ang mga opisyal sa Gaza sa pagpasibangod sa Israel apang nagpanginwala naman ang Israel Defense Forces kag gintudlo sini ang palpak nga rocket launch sang Islamic Jihad nga isa pa ka militant group nga naga-operate man sa Gaza.
Nagdepensa naman ang Islamic Jihad kag nagsiling nga wala sang basehan ang akusasyon sang Israel. Suno sa amo nga militante nga grupo, wala sila nagagamit sang public facilities kaangay sang mga ospital para lamang sa military purposes.
Photo: ABED KHALED/AP
Apisar sini nga mga pahayag, pila na ka Arab countries lakip ang Saudi Arabia, Jordan, Egypt, United Arab Emirates kag Iraq ang nag-isyu sang statements nga naga-kondenar sa Israel kag nag-akusar sa Israeli military sa pagbomba sa ospital.
Linibo man ka protesters ang nagtipon sa Lebanon, Iraq, Jordan, Kuwait, Egypt, Tunisia, kag mangin sa West Bank city of Ramallah agud nga isinggit ang kaugot sa Israel.
Mangin diri sa Pilipinas, nagtipon ang progresibo nga mga grupo agud pakamalauton ang amo nga hitabo.
Kun si Biden naman ang pahambalon, base sa data sang Defense Department, indi iya sang Israeli military ang amo nga pagpasigabong sa ospital.
“And, based on what I’ve seen, it appears as though it was done by the other team, not you,” suno sa US President nga nagatumod sa Hamas kagIslamic Jihad nga pareho nga na-tag bilang “terrorist” groups sa US kag sa iban nga Western governments.
Ang National Security Council spokesperson ang nagpahayag man nga ang analysis sang hitabo ang nagasiling man nga indi Israel ang yara sa likod sang amo nga hitabo.
Suno naman sa spokesman sang Israel Defense Forces nga si Rear Admiral Daniel Hagari, nakahibalo na ang Hamas nga ang ila kaalyado nga Islamic Jihad ang responsable sa pagpasigabong sa ospital apang indi lang sila mag-ako agud nga matum-ok ang Israel.
Dugang naman nga promisa ni Biden, indi pagtalikdan sang Amerika ang Israel.
Ginpasalig man sini nga naga-trabaho sang Estados Unidos sang Amerika kaupod sa iban nga partners sa Middle East agud indi na madugangan ang mga trahedya para sa mga sibilyan. #
