Ginapanindugan sang kampo ni anay House Speaker Martin Romualdez sa ila manifestation kag urgent motion subong nga Lunes, Septyembre 7, nga ipabilin anay ang mamalidha sa Cardinal Santos Medical Center samtang kinahanglanon pa sang iya kondisyon ang pagpa-ospital.
Suno sa dokumento, may documented cardiac history si Romualdez kag yara ini subong sa idalom sang medical care.
Lakip sa iya mga balatian suno sa iya kampo amo ang coronary artery disease, unstable angina, cerebrovascular ischemic disease, Type 2 diabetes, hypertension, kag iban pa.
Ginahingyo man sang kampo nga ipabilin si Romualdez sa idalom sang “continuous lawful custody” samtang yara sa ospital. Lakip diri ang 24-oras nga pagbantay sang mga guwardiya, pag-limit sa mga bisita, padayon nga medical monitoring, kag regular nga pag-report sa korte.
Ginpahayag man sang kampo ni Romualdez nga wala sila nagapangayo sang exemption sa arrest, custody, booking, ukon sa ulihi nga pagbalhin sa italana nga detention facility.
Suno sa ila, ang ila ginapangayo nga hospital confinement nagabase sa “documented medical necessity” ukon narekord kag napamatud-an nga kinahanglanon medikal, kag magapabilin ini sa idalom sang judicial supervision ukon pagdumala sang korte.
