Nadugangan pa ang mga anay kaalyado ni former US President Donald Trump nga maga-kontra sa iya sa Republican presidential nomination para sa 2024 elections.
Ang pinakabag-o nga nagdugang sa listahan amo si former Vice President Mike Pence nga running-mate ni Trump sang 2016.
Ginpahayag nga pormal sini nga i-anunsyo ang iya nga 2024 campaign sa Hunyo 7.
Ang isa pa ka aspirant sa pagka-presidente amo si former New Jersey Governor Chris Christie nga anay adviser ni Trump sang 2016 campaign, apang sang ulihi nangin isa sa mabaskog nga kritiko sang former president.
Ginabati-bati nga sa Hunyo 6 ini maga-anunsyo sang iya nga presidential bid.
Nagaplano man si North Dakota Governor Doug Burgum nga mag-intra sa kumpetisyon.
Yara man sanday U.S. Senator Tim Scott kag former South Carolina Governor Nikki Haley; kag ang ginalantaw strong contender nga si Florida Governor Ron DeSantis nga una nag-anunsyo sang iya plano sang nagligad nga semana.
Bangud sa nagadamo nga lista sang maga-kontra kay Trump sa Republican Party, isa sa mga ginakahangaw-an sang Anti-Trump amo nga basi kun matunga ang boto sa challengers kag magapabor ini sa former president nga may yara na subong sang sigurado anga 30% nga supporters.
Nahibaluan nga kun basehan ang polling average, si Trump ang nagapanguna nga may 53% kag ang ginalantaw nga pinakamalapit nga pangontra amo si DeSantis. #
