Kun nagalibog ang ulo mo kun paano paiguon ang P200 para sa imo kaugalingon sa isa lang ka adlaw, ano pa gid ayhan sa tawo nga may salagudon pa kag pakan-on sa ila nga balay?
Tuman ka budlay pa-iguon ang P200 nga budget nga amo ang gin-aprubahan ni Presidente Rodrigo Duterte nga ihatag sa mga pigado nga pamilya kada bulan sa bilog nga tuig.
Base sa mga sentimyento sang mga nagapaninda sa merkado sa syudad sang Iloilo, indi gani ini makasustiner sa isa ka adlaw nga kalan-on sang bilog nga pamilya.
Si Dina Baldenibro sang San Juan, Molo, halimbawa, nakabakal lang sang isa ka kilo nga bugas, panakot, tatlo ka itlog, tunga sa kilo nga tiil sang manok, kag uling — sulod na tanan sa iya nga P200.
Sa interview sang Bombo Radyo kay Baldenibro, iya ginpahayag nga anum pa sila sa sulod sang puluy-an gani nga indi gani halos ini makaigu sa isa lang ka pagpungko sa pagkaon.
Kun kulang suno sa iya, posible nga mamantinir na lang sang lugaw ang mga tawo kun amo man sini ang ila nga budget.
Ang P200 nga subsidiya sa mga pigado nga pamilya kada bulan amo ang proposal nga ginrekomendar sang Department of Finance (DOF) kag gin-aprubahan naman ni Presidente Duterte sini lang nga semana.
Ayuda ini para sa mga Pinoy bangud wala nagpasugot ang presidente nga suspendiron ang excise tax apisar nga nagapalanglapaw na ang presyo sang gatong.
