Sandiganbayan, nagdagdag na sang arrest warrant vs Jojo Ang

Nagpagwa sang warrant of arrest ang Sandiganbayan batok kay Uswag Ilonggo Party-list Representative James “Jojo” Ang.

Ini ang may kaangtanan sa 14 counts sang graft nga ginpasaka sang Office of the Ombudsman batok sa iya bangud sang ginaalegar nga kaangtan sa government contractor.

Base sa Sandiganbayan, may probable cause ukon nagakaigo nga basehan agud padayunon ang kaso gani nagpagwa man ini sang Hold Departure Order batok sa kongresista agud indi siya makaguwa sa pungsod.

Ginpaguwa sang Third Division ang arrest warrant kag Hold Departure Order duha ka adlaw matapos gin-indict sang state prosecutors si Ang sa paglapas sa Section 3(h) sang Republic Act 3019 ukon ang Anti Graft and Corrupt Practices Act.

Ginaakusaran si Ang nga may interes sa isa ka construction firm nga nakabaton sang P214 million nga kontrata gikan sa Department of Public Works and Highways (DPWH) samtang yara siya sa serbisyo publiko.

Suno sa Konstitusyon, ginadumilian ang mga opisyal sang gobyerno nga may personal nga interes sa mga kontrata sang gobyerno.

Matandaan nga nalakip man si Ang sa mga ginpangalanan sang kontratista nga si Pacifico “Curlee” Discaya sa iya ginatawag nga payoff ledger.

Suno kay Discaya, isa si Ang sa mga opisyal nga nagapangayo sang kwarta pagkatapos makadaog ang ila kompanya sa bidding sang proyekto sang gobyerno. Apang, ginpanginwala na ini anay ni Ang.

Una naman nga ginpahayag sang kongresista nga matinlo ang iya konsensya kag wala niya gin-gamit ang iya posisyon para sa personal nga kaayuhan.

Ang graft isa ka kaso nga mahimo mapiyansahan. Mahimo siya makaguwa kag makaangkon sang temporaryo nga kahilwayan kun makabayad sang P30,000 nga piyansa sa kada isa sa 14 ka counts.

Kalakip man sa gin-akusaran sang Ombudsman amo si anay Sultan Kudarat 2nd District Representative Arnulfo Go kag tatlo pa ka iban nga indibidwal may kaangtanan sa kontrobersyal nga flood control projects. Nagpagwa man ang Sandiganbayan sang warrant of arrest batok kay Go.#