ILOILO CITY- Nagpasar ang Sangguniang Panlalawigan sang Iloilo sang apat ka mga resolusyon may kaangtanan sa pagbato sa kaso sang acute gastroenteritis sa probinsya.
Tatlo sa sini nga mga resolusyon ang ginpasar ni i Iloilo 5th District Board Member Carol-V Espinosa Diaz nga ginalakipan sang mga masunod:
- Resolution nga nagahingyo sa Department of Health Region 6, Iloilo Provincial Health Office, Municipal Health Offices/City Health Office sang 42 Municipalities 1 component city sa probinsya sang Iloilo nga magpatigayon sang mandatory potable water testing sang tanan nga Water Refilling Stations sa probinsya kag i-inspect ang tanan nga Water Refilling Stations kun bala may yara ini sang Business kag Sanitary Permits agud nga maka-operate.
- Resolution nga nagapanawagan sang Committee investigation kun bala ginapatuman sa probinsya sang Iloilo ang Water Code of the Philippines sa idalom sang Presidential Decree No. 1067.
- Resolution nga naga-engganyo sa publiko nga maggamit sang ginpabukalan nga tubig para sa pag-inom ukon magbakal sang tubig nagikan sa Water Refilling Stations nga lisensyado kag safe.
Ang isa naman ka resolution ang ginpasar ni Iloilo 1st District Board Member Marcelo Valentine Serag nga amo man ang chairman sang Committee on Health and Sanitation sa Sangguniang Panlalawigan.
Ini amo ang Resolution nga nagahingyo sa Local Government Units nga magpatigayon sang inspeksyon sa mga food handling establishments lakip na ang mga nagabaligya sang streat food.
Sa privilege speech ni Board Member Carol Espinosa- Diaz, iya ginhatagan importansya ang temprano nga paghimo sang tikang agud nga mapunggan ang pagdamo sang kaso sang amo nga balatian.
Nahibaluan nga as of September 13, nagsaka na sa 38 ang recorded cases sang acute gastroenteritis sa probinsya.
