ILOILO CITY- Mahimo sa masunod pa nga mga semana madesisyunan ang pagsaylo sang Jaro Covered Gymnasium nga nahamtang sa Jaro Plaza.
Sa interview sang Bombo Radyo kay Iloilo City Mayor Jerry Trenas, iya ginpahayag nga may tatlo ka areas subong ang ginalantaw nga patindugan sang Jaro Covered Gymnasium.
Suno sa alkalde,ang basehan sang pagsaylo sang Jaro gymnasium amo nga Heritage Law kun sa diin indi kabahin sang plaza ang kaangay nga struktura.
Ginpahayag man sang alkalde nga ginaasikaso na subong ang pagasayluhan sang mga opisina nga yara sa Jaro gym.
Gindugang man niya nga may duta ang syudad sa tabuk sang Jaro Plaza apang may yara sang nagaokupa subong kag sa tion nga marecover, diri ipatindog ang City Social Welfare and Development Office.
May yara man sang ginahikot subong ang syudad nga hulamon ang propedad sang Central Philippine University agud patindugan sang Jaro Iloilo City Action and Response center nga magalakip sang police station , fire protection kag ambulance.
