ILOILO – Nangin mainit ang ginpatigayon nga Senate sub-committee hearing sa proposed budget sang Department of Justice may kaangtanan sa pagpatindog sang Public Attorney’s Office sang forensic laboratory.
Sa interview sang Bombo Radyo kay Senate Minority Leader Franklin Drilon, iya ginpahayag nga illegal kag wala sang paganugot ang pagpatindog sang nasambit nga laboratory.
Suno kay Drilon, indi mahimo nga ipatindog ang isa ka opisina paagi sa General Appropriations Act bangud nagakadapat ini nga mag-agi sa bilang isa ka layi.
Ginpahayag ni Drilon nga ang ginaduso sang Public Attorney’s Office ang maathag nga isa ka paglapas sa trabaho sang National Bureau of Investigation kag Philippine National Police nga may yara man sang tagsa ka forensic laboratory.
Santo man sa pahayag sang senador, ginbasura na ang proposal sang Public Attorney’s Office kag natalana nga ihalin ang proposed funding sa forensic laboratory sang National Bureau of Investigation.
