ILOILO CITY- Hatagan sang Senado ang airport authorities sang bastante nga panahon agud imbestigaran ang ugat gid sang natabo nga sunog sa NAIA- Terminal 3 parking area nga naghalit sa 19 ka mga salakyan sa compound, antes maghimo sang masunod nga posible nga tikang ang Senado.
Suno kay Sen. Grace Poe nga chairperson sang Senate Committee on Public Services, pangayuon nila ang report sang tagdumalahan sang paluparan kag hibaluon kun kinahanglan sang Senate investigation bilang kabahin sang ila legislative ukon oversight function.
Para kay Poe, magluwas sa kabangdanan sang sunog, kinahanglan man hibaluon sang airport authorities kun paano sila nagresponde kag kun paano ma- improve ang ila ginhimo sa tion nga magluntad ang kaangay nga insidente.
Temporaryo naman nga ginpasirado sang Manila International Airport Authority (MIAA) ang open parking area sa NAIA terminal 3 samtang padayon ang imbestigasyon sang Bureau of Fire Protection (BFP) sa natabo nga sunog.
Gin-abisuhan na man ang mga tag-iya sang naumid nga mga salakyan nga magkuha sang fire incident certificate sa Bureau of Fire Protection para maka-claim sila sang insurance benefits.
