Balantayan subong nga adlaw, Mayo 18, ang pag-convene sang Senado bilang impeachment court para sa trial batok kay Vice President Sara Duterte.
Sa sulat ni Senate President Alan Peter Cayetano sa iya mga kaupdanan sang Mayo 15, ginpahibalo sini ang pormal nga pagbaton sang Senado sang House resolution nga naga-unod sang articles of impeachment kag annexes.
Bangud sini, magatipon sila bilang impeachment court alas tres karon sa hapon sunod sa applicable rules and procedure.
Ginmanduan man ang mga senador nga magsuksok na sang ila nga mga roba sa sesyon bangud sila ang magaserbe nga impeachment trial judges.
Matandaan nga sang nagligad nga Lunes ukon takos na isa ka semana subong nga adlaw, 257 ka mga kongresista sa Kamara ang nagpabor nga i-impeach si Duterte sa ikaduha nga sunod-sunod nga tuig bangud sang alegasyon sa misused secret funds, unexplained wealth, kag pamahog nga patyon si President Bongbong Marcos, First Lady Liza Araneta-Marcos, kag former House Speaker Martin Romualdez.
Magluwas sa pag-convene sang impeachment court karon, balantayan man ang huring-huring nga may panibag-o nga kudeta agud nga makakas si Cayetano bisan nga isa ka semana pa lamang ini sa posisyon bilang Senate President.
Una na nga ginpahayag ni Cayetano nga masako ang minority sa pag-istorya sa iban nga myembro sang majority agud nga updan sila sa panibag-o nga kudeta.
Sandig sa nagalapta nga reports, nagaguwa ang pangalan ni former Senate President Juan Miguel “Migz” Zubiri nga amo ang possible nga i-eleher liwat sa pwesto sa Lunes.
Matandaan nga isa si Zubiri sa duha nga nag-abstain kadungan sang binotohay sang Lunes sang hapon.
Si Zubiri amo ang una nga Senate President sa idalom sang administrasyon ni President Ferdinand Marcos Jr., antes natabo ang kudeta kag gin-islan siya ni Chiz Escudero sang 2024.
