Ginpahayag ni Senator Cynthia Villar nga kun indi matapna ni President Ferdinand ‘Bongbong’ Marcos Jr. ang smuggling sang mga ulutanon, prutas, karne, kag iban pa nga agricultural products sa pungsod, wala na sang iban nga makahimo sini.
Si Villar amo ang ginalauman nga padayon nga magapungko bilang pinuno sang Senate committee on agriculture and food sa 19th Congress, samtang si Marcos naman amo mismo ang temporaryo nga nagapamuno sa Department of Agriculture (DA).
Suno kay Villar, mas maayo gid nga si Marcos mismo ang DA Secretary bangud nga mapatuman sini gilayon ang mga layi nga ginpasar sang Kongreso kag mabuligan ang mga mangunguma nga mangin produktibo kag subong man mapasigurado ang food security sa pungsod.
Matandaan nga antes nagtakop ang 18th Congress, ginpaguwa sang senado ang lista sang mga gina-alegar smugglers sang agricultural products kag ang ila nga protectors sa gobyerno.
Suno kay Villar, ang lista sang 22 ka mga tawo nga gin-release ni Senate committee of the whole chair kag anay Senate president Vicente Sotto III ang nagaunod sang daan kag bag-o nga mga pangalan.
Lakip sa mga pangalan nga yara sa lista amo ang mga opisyal sang DA kag sang Bureau of Customs (BOC).
Una na nga nagpahayag ang mga senador nga apisar nga may yara sang Republic Act 10845 (Anti-Agricultural Smuggling Act of 2016) kun sa diin na-categorize ang crime of smuggling agricultural products bilang economic sabotage, wala sang bisan isa ka smuggler ang na-convict kag na-preso.
