Pirma na lang ni President Ferdinand Marcos Jr. ang kulang kag mahimo na nga layi sa Pilipinas ang kontrobersyal nga Maharlika Investment Fund bill.
Ini matapos pormal na nga gin-adoptar sang Kamara ang bersyon sang Senado sang amo nga hagna subong nga adlaw, Mayo 31.
Indi man makakilibot nga pirmahan ini sang presidente bangud makapila niya ini ka beses nga gin-endorso sa publiko kag gin-certify nga urgent sa Kamara kag Senado.
Una na nga ginpahayag ni Senate President Juan Miguel Zubiri nga nagpasalig na ang Kamara nga i-adopt ang Senate version antes pa man ang pagpatigayon sang meeting sa bicameral conference committee kaina sang hapon.
Isa ka semana ang plenary discussions sa Senado antes ginpasar ang hagna, kag ginkasugtan nga indi paggamiton ang state pension funds bilang seed money sa ginaduso nga sovereign wealth account.
Matandaan nga sa una nga plano, kuhaon kuntani ang initial investments halin sa Government Service Insurance System (GSIS) kag sa Social Security System (SSS) apang ginsugata ini sang wala-tuo nga pagpakamalaot sang publiko bangud mabutang sa risgo ang pension funds sang Filipinos.
Sa latest version sang sini nga hagna, ginpanubo man ang numero sang directors sa Maharlika Investment Corporation board halin 15 pa-9, kag indi pwede nga mangin myembro ang mga indibidwal nga may pending cases kaangot sa fraud, corruption, tax evasion, kag iban pa nga kaangay nga kaso.
Ang MIF isa isa ka sovereign wealth fund nga gamiton sa pag-invest sa nagkalain-lain nga assets kaangay sang foreign currencies, fixed-income instruments, domestic kag foreign corporate bonds, commercial real estate kag infrastructure projects.
Ini nga pondo ang ginalauman nga maka-generate sang income para sa gobyerno kag makatib-ong sang pag-umwad sang ekonomiya. #
