ILOILO CITY- Gintawag ni Senator Ronald “Bato” Dela Rosa nga maka-ilinsulto ang ginhimo ni Senator Raffy Tulfo nga pagwalk-out sa Senate hearing sang Committee on Public Order and Dangerous Drugs.
Ang walkout natabo sa tunga sang hearing sa kaso sang isa ka amay kag anak sini nga ginaalegar ginkustodiya sang Bulacan policemen nga wala sang ano man nga warrant of arrest nga sanday Rodelio Vicente kag iya anak nga si Julius.
Samtang padayon ang hearing, napilitan si Tulfo nga magtindog kag maghalin sa iya pulungkuan bangud sa ginakabig niya nga inconsistencies sa mga testimoniya sang resource persons halin sa Philippine National Police.
Kasunod sang insidente, nagpabutyag sang pagkadismaya si Dela Rosa nga amo ang chairman sang Senate committee kag former chief sang Philippine National Police.
Suno kay Dela Rosa, prerogative ni Tulfo nga maghalin kun indi na sini gusto nga magpamati sa hearing.
Apang suno sa iya, luyag lang niya nga mangin patas.
Ang police ang gin-report nga nagapatigayon sang manhunt kay alias “Elmer” sang August 12, 2023, sang nagsulod sila sa balay ni Rodelio Vicente.
Antes ang walk-out, ginkwestyon ni Tulfo kun ngaa sa baylo nga uniporme, nagasuksok sang bonnets ang amo nga mga pulis sa ila operasyon.
Naakig man si Tulfo sa inconsistent nga sabat sang pila ka resource persons sang ginpamangkot niya ang Bulacan police kun may warrant of arrest sa operasyon.
Kasunod sang walk-out ni Tulfo, ginpadayon ni Dela Rosa ang hearing kaupod si Senator Robin Padilla.
