ILOILO CITY- Ginkumpirma sang San Miguel Municipal Police Station nga may mga daan na nga criminal records ang Sangguniang Kabataan (SK) Federated President sa San Miguel, Iloilo.
Ini amo si Mikhail Tadifa, 24, residente sang Barangay 11 sa amo nga banwa nga suspek sa natabo nga pagpangluthang sa barangay San Jose, San Miguel kun sa diin ang biktima amo si Dyezrelle Malaygay, 30, residente sang barangay kun sa diin natabo ang pagpangluthang sang nagligad nga adlaw.
Sa interview sang Bombo Radyo kay PMaj Sullen Domingo, hepe sang San Miguel PNP, iya ginpahayag nga
may kaso sadto si Tadifa nga attempted murder matapos ginluthang ang former Punong Barangay sang Igtambo, San Miguel apang naareglo.
Suno kay Domingo, may pending man nga kaso si Tadifa angot sa paglapas sa PD 1602 ukon Illegal Gambling.
Sa subong suno sa hepe, ginahikot na ang pagpasaka sang kaso batok kay Tadifa kag ginahulat nalang ang affidavit sang biktima nga si Malaygay nga padayon pa nga ginabulong sa ospital matapos nadaplisan sang bala sa ulo.
Nagapabilin naman nga at- large ang suspek.
