ILOILO CITY- Ginpaathag sang isa ka Bombo Abogado nga indi madali-dali mapahalin sa posisyon ang SK Federation President sang San Miguel, Iloilo nga ginatudlo suspek sa pagluthang sa isa ka lalaki nga nakaaway niya sa social media.
Ang suspek amo si Mikhail Tadifa, 24, residente sang Barangay 11 samtang ang biktima amo si Dyezrelle Malaygay, 30, residente sang barangay San Jose, San Miguel kun sa diin natabo ang pagpangluthang.
At-large ang suspek samtang ginabulong naman sa ospital ang biktima matapos nadaplisan sang bala sa ulo.
Sa interview sang Bombo Radyo kay Atty. Noel Palomado, may yara sang nagakaigo nga proseso antes mapahalin sa pwesto si Tadifa.
Suno kay Palomado, administrative ukon criminal complaint man ang ipasaka batok kay Tadifa, kinahanglan nga may yara sang subtanstial evidence batok sa iya.
Pahayag ni Palomado, bangud nga isa ka opisyal si Tadifa,may yara sang proseso sa idalom sang SK Reform Law nga nagaplastar sang mga grounds kun paano mapahalin sa pwesto ang amo nga SK Federation President.
