ILOILO CITY- Hugot nga ginpanindugan sang bag-o napilian nga Sangguniang Kabataan Federation President sa Iloilo City nga wala sang natabo nga hocus- pocus sa ginpatigayon nga eleksyon.
Sa amo nga eleksyon, wala sang kontra si Sangguniang Kabataan Chairman Jelma Cystel Implica sang Jereos, La Paz, Iloilo City matapos nga ginsirado gilayon ang nomination sa pagka- Presidente.
Sa interview sang Bombo Radyo kay Implica, iya ginpahayag nga ang pagdaug niya sa eleksyon nga wala sang kontra ang nagapakita lang sang dako nga pagsalig sa iya sang kaangay niya nga mga Sangguniang Kabataan chairpersons sa syudad.
Suno kay Implica, ang iya nga focus subong amo nga tungdan ang iya responsibilidad sa pagduso kag pagpatuman sang mga programa nga makabenepisyo gid ang mga Ilonggo nga pamatan-on.
May kaangtanan naman sa nagtuhaw nga isyu sang term- sharing, ginpahayag sang natungdan nga wala siya sang ihibalo tuhoy diri kag kun diin naghalin ang amo nga istorya.
Kumbinsido naman si Mayor Treñas nga wala sang natabo nga kamala-malahan sa eleksyon sang Sangguniang Kabataan Federation sa syudad.
Suno sa alkalde may mga kaugalingon na nga panindugan ang mga Sangguniang Kabataan chairpersons gani indi na ang mga ini madiktahan.
