ILOILO CITY- Dismayado ang Punong Barangay sang Sooc, Arevalo, Iloilo sa isa ka SK Kagawad nga nagpakilala bilang Acting SK Chairman apisar nga may aktibo pa nga SK Chairman ang barangay.
Ini matapos nga gin-post sa facebook page nga Youth For Treñas nga nagasiling nga naghiwat sang isa ka meeting kaupod ang youth leaders nga ginpangunahan sang Acting SK Chairman Kim Cyril Sina-on Siacon.
Ang naelihir kag aktibo nga Sangguniang Kabataan Chairman amo si Silca Jane Quiman Agudo.
Sa interview sang Bombo Radyo kay Punong Barangay Ricardo S. Tugado, iya gin-ako nga ginhatagan gid man niya sang otoridad si Siacon agud mag-organize sang youth organization apang gin-athag nga wala niya ini ginhambalan nga siya ang mangin Acting SK Chairman bangud nga ang aktibo nga SK Chairman amo si Agudo.
Suno kay Tugado, ang iya mando kay Siacon amo nga magtipon sang mga pamatan-on para sa masunod nga eleksyon.
Wala naman gin-ako ni Tugado nga para ini sa kampo sang mga Treñas apisar nga ang facebook page ang naga-promote kanday Mayor Jerry Treñas kag Raisa Treñas- Chu.
Ginpatawag naman sini sanday Siacon kag Agudo agud mahitso ang nasambit nga isyu.
