Iga-review sang 15th Sangguniang Panlalawigan ang security protocols lakip na ang Inter-agency coordination mechanisms para sa seguridad sang mga pasahero sa Iloilo International Airport kasunod sang nagluntad nga shooting incident sa sulod sang paluparan sang Enero 28, 2026.
Santo sa ginpasar nga Resolution 2026-02-17, nagapanawagan ini sa Civil Aviation Authority of the Philippines (CAAP), Department of Transportation (DOTr), kag ang Philippine National Police Aviation Security Group (PNP-AVESGROUP) agud madiskusyonan ang nagakadapat nga tikang nga himuon sa nasambit nga insidente.
Sa interview sang Bombo Radyo kay Iloilo Vice Governor Nathalie Ann Debuque, Sponsor sang amo nga resolusyon, iya gin-athag nga ini ang gin-ubra nga lihok indi agud basulon ang kun sin-o man ang may sala, sa baylo ini agud tan-awon kun nasunod ang protocols kag matumod ang ‘weaknesses’ kag makahatag man sang rekomendasyon ang katapo sang provincial board.
Apisar nga yara sa idalom sang isa ka national government agency ang paluparan, suno sa Bise Gobernador nga kinamatarung sang Sangguniang Panlalawigan nga ipatuman ang legislative oversight bangud natabo ini sa sulod sang probinsya sang Iloilo.
Nangin positibo naman ang response sang mga ipatawag nga mga ahensya kag may patigayunon nga committee hearing sa bwas nga adlaw sang Huebes, Pebrero 5, 2026 nga ginpangunahan sang Committee on Transportation, Communication, and Public Utilities kun sa diin si Debuque man ang Chair, kaupod ang Committe on Public Order and Security sa pagpanguna ni 2nd Dsitrict Board Member June S. Mondejar.
