ILOILO CITY- Nagapati ang mga sugarcane planters sa Iloilo nga dako ang mabulig sa ekonomiya kag sa ila sektor kun may yara na sang Standard Retail Price (SRP) sa kalamay.
Sa interview sang Bombo Radyo kay Iloilo 3rd District Board Member Matt Palabrica, iya ginpahayag nga mangin bentaha ang pag-set sang SRP bangud makabulig ini sa pagpabilin sang patas nga presyo sa nagkalain-lain nga mga store locations ukon selling channels.
Suno kay Palabrica, mangin pabor man ini ilabi na sa mga konsumidor agud nga indi man sila mat-am sa mahal nga kalamay.
Nahibaluan nga subong nga adlaw natalana nga magpatigayon sang stakeholders’ consultation ang Department of Agriculture may kaangtanan sa pagkontrol sang presyo sang kalamay sa lokal nga merkado.
Una na ginpahayag ni Agriculture Undersecretary Kristine Evangelista nga base sa ila monitoring, ang retail price sang refined sugar sa iban nga merkado ang yara na sa P115 tubtob P120 per kilo gani importante ang pagpatuman sang SRP sa kalamay agud malikawan ang indi kinahanglan nga pagtimbuok sang presyo.
Dugang ni Evangelista nga apisar yara sa P90 ang prevailing price, halos doble naman ini kun ikumparar sa prevailing price sang naglgiad nga tuig nga P52 per kilo.
Sa subong, ginakonsiderar sang DA ang pag-set sang P90 SRP sa kalamay.
Sa tion nga ma-set na ini, isa ka enforcement team ang maga- monitor sang compliance sa merkado kag ang sin-o man nga indi magtuman ang dagdagan sang show cause order.
