ILOILO CITY- Nagtukod sang bag-o nga organisasyon ang mga stakeholders sang rice industry sa Iloilo agud ipalab-ot sa gobyerno ang ila sentimento may kaangtanan sa mga isyu tuhoy sa bugas ilabi na sa pagpatuman sang price ceiling santu sa Executive Order 39 ni President Ferdinand Marcos, Jr.
Ini kadungan sang ginpatigayon nga meeting sang mga stakeholders kaupod ang Department of Trade and Industry (DTI) kag Bureau of Plant Industry (BPI).
Napilian nga presidente sa bag-o natukod nga grupo nga Rice Retailers, Traders, Millers and Rice Importers amo si Mr. Ildefonso Dolorfino samtang Vice President naman si Mrs. Nenen De Vicente.
Sa interview sang Bombo Radyo kay Mr. Dolorfino, iya ginpahayag nga pila sa plano nila himuon amo ang pagpasa sang position paper sa national government agud ipahibalo ang negatibo nga epekto sang price ceiling sa ila negosyo.
Suno kay Dolorfino, kuntani hatagan sila sang ligwa sang presidente ilabi na nga sa ila dako nga kapital, tuman ka gamay ukon halos wala na sila ginansyahon bangud sa price ceiling.
