ILOILO CITY- Ginkalipay sang mga sugarcane planters kag farmers sa Western Visayas ang pagbasura ni President Ferdinand “Bongbong” Marcos Jr. sa proposal nga mag-import sang dugang nga 300,000 metric tons sang kalamay ang Pilipinas.
Sa interview sang Bombo Radyo kay Iloilo 3rd District Board Member Matt Palabrica nga kabahin man sang local sugar industry, iya ginpahayag nga ang desisyon sang presidente ang bentaha gid sa lokal nga industriya sang kalamay agud nga sa tion nga milling season, ma-stabilize ang presyo sang kalamay.
Suno kay Palabrica, sa pagkamatuod, sa Rehiyon 6, wala man sang shortage sang kalamay kag nakaumpisa naman sang paggaling sang tubo ang mga planta sa Negros Occidental kag sa masunod naman nga bulan magasugod ang paggaling sa Panay.
Nagapati si Palabrica nga ang pagbasura ni Marcos sa importation ang resulta sang intel gatherings nga may yara sang mga traders nga naga-hoard sang kalamay agud mag-imbento sang artificial shortage nga scenario.
Nagpanawagan naman ini sa gobyerno nga maghimo sang tikang agud tultulon ini nga mga stockyards nga naga-hoard sang kalamay.
Matandaan nga nagpagwa sang Sugar Order 4 ang Sugar Regulatory Administration (SRA) may kaangtanan sa import program para sa crop year 2021-2022
Nakit-an sa amo nga order nga may pirma na sa ibabaw sang pangalan ni Presidente Marcos bilang SRA Board Chairperson kag Agriculture Secretary, apang suno kay Press Secretary Trixie Cruz-Angeles, indi ini matuod nga pirma sang presidente.
Ginkwestyon kun si Agriculture Undersecretary Leocadio Sebastian ang nagpirma sa amo nga dokumento bangud siya anay ang gin-designar sang presidente nga alternate sa SRA board.
Wala pa sang sabat ang SRA kag ang DA sa amo nga mga pamangkot kasunod sang pagpanginwala sang Malacañang.
