Nagdangat sa P158,000 ang estimated nga balor sang halit nga ginbilin sang sunog nga nagluntad sa sulod sang Iloilo Science and Technology University (ISAT-U).
Sa interview sang Bombo Radyo kay Senior Fire Officer 1 Denmark B. Macoco, acting chief sang Investigation and Intelligence Unit sang Iloilo City Fire Station, iya ginpahayag nga tatlo ka mga hulot sa buluthuan ang apektado.
Ini amo ang Cultural Office, Physical Education room, Faculty Office kag nalakip man ang marching band room.
Pahayag sini, mahimo pa maglain ang balor sang halit kun magpasa ang eskwelahan sang affidavit of fire loss nga amo man ang iga-deklarar sang Bureau of Fire Protection (BFP).
Wala naman sang na-rekord nga nasamaran kasunod sang insidente nga nagluntad pasado alas nueve sa aga kaina, kag napalong pasado alas dies.
Padayon pa nga gina-imbestigaran sang BFP ang rason sang fire incident.
Nagpahanumdom naman ang BFP official sa publiko ilabi na sa mga magabisita sa patyo kadungan sang Undas nga i-check gid sang maayo ang mga appliances, kag i-unplug, i-switch off, ukon i-shut down ang kuryente antes maghalin sa balay.
Nagpanawagan man ini nga indi pagbayaan ang mga nakasindi nga kandila nga amo man ang masami nga ginahalinan sang kalayo.
Nahibaluan nga antes sa ISAT-U, may duha pa ka sunod-sunod nga sunog nga nagluntad sa Iloilo City kagab-i partikular sa Veteran’s Village sa City Proper kag sa Barangay Calaparan sa Arevalo.#
