ILOILO CITY — Naglab-ot na sa 58% ang completion sang ginatukod sang Department of Public Works and Highways Region 6 (DPWH 6) nga Sunset Boulevard nga anay ginatawag nga Iloilo River North Bank Road.
Sa interview sang Bombo Radyo kay Engr. Sanny Boy Oropel, regional director sang nasambit nga ahensya, iya ginpahayag nga posible ma-delay ang pagtukod sa Sunset Boulevard bangud kinahanglan pa nga kumbinsihon ang mga tag-iya sang lupa nga masakop sang amo nga proyekto.
Suno kay Oropel, matapos na kuntani subong nga Oktobre 2024 ang proyekto, apang bangud man sa nasambit nga problema, posible pa ini nga madugayan.
Ginpahayag man sini nga ang boulevard ang may 7 kilometers nga kalaba-on halin sa distrito sang Mandurriao padulong sa Pakiad, Oton, Iloilo.
Nahibaluan nga ang proyekto ang sa idalum sang International Builders Corporation (IBC) kag magaserbe nga extension sang Iloilo River Esplanade nga nagabalor sang P1.4 billion.
Plano naman nga tamnan sang Iloilo City Government ang Sunset Boulevard sang 20,000 ka mga native trees.
