Natumod na sang kapulisan ang tawo nga nagluthang-patay sa 14-anyos nga bata nga babaye samtang nga nagasabat ini sa iya modules sa sulod sang ila balay sa Talisay City, Cebu.
Suno sa Police Regional Office-Central Visayas, hawiran anay nila ang pangalan sang suspek samtang nga padayon pa ang follow-up operations agud nga maaresto ini.
Wala sang timeline suno sa regional office apang ang mandu sang regional director amo nga madakpan ang killer kag pasakaan sang mabug-at nga kaso.
Lunes sang aga sang natabo ang krimen sa Barangay Cansojong sa Talisay.
Ginpahayag nga masako ang biktima nga si Jaquiline Reponte sa pagsabat sa iya modules sang hinali lang nga may nanuktok, kag sang wala niya ini ginsabat, nagsulod ang lalaki sa ila balay kag gintiro siya nga rason sang iya kamatayon.
Base sa inisyal nga imbestigasyon, ang gunman ang involved sa aktibidad sa iligal nga droga. Natukiban man nga suod ang biktima sa killer.
Nagpakig-angot man ang Talisay police sa iban nga talatapan sang kapulisan agud nga indi na makaguwa pa ang killer sa probinsya sang Cebu.
Una na nga ginkondenar sang Department of Education ang amo nga hitabo kag nagpanawagan sa pagsolbar sa krimen kag pag-aresto sa suspek.
