AJUY, ILOILO – Blangko pa ang Ajuy Municipal Police Station sa motibo sang mga suspek sa pagluthang-patay sa duha ka mga persona sa Sitio Nabitasan, Barangay Tipacla, Ajuy, Iloilo.
Sa interview sang Bombo Radyo kay Police Captain Roy Castro, hepe sang Ajuy Police Station, iya ginpahayag nga nagapadayon pa ang tul-id nga imbestigasyon sang kapulisan kaangot sa kamatayon sang mga biktima nga amo sanday Jovel Castor, 40 anyos, kag Sonny Articuna, 51 anyos, lunsay residente sang Barangay Tipacla.
Mismo ang pamilya suno kay Castro ang wala man sang ideya kun sin-o ang nakaaway sang duha bangud kun basehan ang ila pahayag, lunsay ordinaryo kag mabuot nga tawo ang mga biktima.
Matandaan nga naga-angkasanay ang duha sa motorsiklo kahapon, Hunyo 21, sang natabo ang pagpangluthang.
Narekober naman sa area ang duha ka fired shot shell nga compatible sa 12 gauge shotgun, siyam ka fired cartridge case nga compatible sa 45 caliber pistol, kag isa ka fired bullet nga compatible sa 45-caliber pistol.
