ILOILO CITY- Mapati ka kag sa indi, ang temper tantrums ukon pagmaoy sang bata ang importante nga bahin sang ila emotional health kag well-being.
Isa man ini sa pinaka-challenging nga aspeto sang imo pagka-ginikanan,apang isa ini ka butang nga maayo para sa imo kag sa imo bata.
Suno kay Kate Orson, isa ka iloy,parent educator sa Basel, Switzerland, kag author sang Tears Heal: How to Listen to Our Children, ang luha naga- contain sang cortisol nga amo ang stress hormone gani ang paghibi nagapagwa sang stress gikan sa lawas kag kun maobserbahan, ang mga bata nga natapos na sa pagmaoy ang nagakalma man lang.
Suno naman kay Deborah MacNamara, Ph.D., isa ka parent educator, ang tantrums nagabulig sa bata sa pag-angkon sang maayo nga tulog bangud nga napautwas niya ang iya nabatyagan kag indi niya ini madala sa pagtulog.
Ginpahayag naman ni Michelle Pate, parenting instructor kag program manager sang Hand in Hand Parenting sa Oregon, mas madamo nga oras ang mahatag naton sa pagpamati sa ila tantrums samtang yara sa balay, mas gamay nga natago nga emosyon ang ila madala sa tion nga maggwa sa balay kag malikawan nga magmaoy sila sa publiko.
