ILOILO CITY – Nagsapol na ang Local Government Unit sang Dumangas kaupod ang Philippine Coast Guard kag Philippine National Police may kaangtanan sa pag- operate sang “Task Force Puerto.”
Ini kasunod man sang hingyo sang Philippine Coast Guard sa mga local government units nga mag-activate sang amo nga task force para sa kampanya batok sa pagpasulod sang iligal nga druga.
Sa interview sang Bombo Radyo kay PMaj. Ken Albert Lepsia, hepe sang Dumangas Municipal Police Station, iya ginpahayag nga sa subong, may yara na sang building ang task force apang indi pa ini operational bangud kulang pa sa mga gamit.
Suno kay Lepsia, may marching order na ang alkalde nga dapat ma -activate na ini gani ginalauman nga mas madasig ang proseso agud makasugod na sila sang operasyon.
Nahibaluan nga ang Task Force Puerto ang ginatapuan sang Philippine National Police, Philippine Drug Enforcement Agency, Regional Maritime Office, Bureau of Customs, Criminal Investigation and Detection Group,Highway Patrol Group, Philippine Coast Guard, kag iban pa nga ahensiya sang gobyerno.
