Ginkumpirma sang Department of Migrant Workers (DMW) nga tatlo ka mga Pinoy ang napatay bangud sa lapnagon kag maragtason nga pagbaha sa United Arab Emirates.
Suno sa ahensya, duha sa sini nga mga biktima ang ginbawian sang kabuhi bangud sa suffocation sa sulod sang ila salakyan, samtang isa naman ka overseas Filipino worker ang napatay bangud sa vehicular accident nga ginaangot man sa baha.
Sa inisyal nga report sang DMW, isa ang lalaki kag duha ang mga babaye nga biktima.
Nagpasalig man ang ahensya nga buligan ang pamilya sang mga napatay. Indi pa subong masapubliko ang pangalan sang mga biktima, apang napahibalo na sang DMW ang ila nga mga himata.
Magluwas sa DMW, ginapakig-angutan man ang Overseas Workers Welfare Administration (OWWA) offices sa Dubai kag Abu Dhabi agud makahatag sang assistance sa pamilya sang tatlo ka OFWs.
Ini ang ginakabig nga pinakabaskog nga pag-ulan sa United Arab Emirates sa sulod sang 75 ka tuig suno sa meteorological authorities.
Suno pa sa National Center of Meteorology sa Abu Dhabi, ini nga sahi sang ulan ang naglapaw sa records halin sang 1949 sang ang area ang kabahin pa lamang sang British protectorate nga Trucial States kag antes pa man nadiskubre ang langis.
Nahibaluan nga kulang ang United Arab Emirates sa mga kinahanglanon nga drainage infrastructure agud nga malikawan kuntani ang kaangay sini nga mga senaryo kun mag-ulan. Ini bangud isa ini ka disyerto nga nasyon kag tuman gid lamang ka laka ang pag-ulan sa sulod sang isa ka tuig.#
(Reuters)
