Ginkumpirma ni National Security Adviser Eduardo Año nga tatlo ka navy personnel ang nasamaran bangud sa ulihi nga water cannon attack sang China sa resupply boat sang Pilipinas nga padulong sa Ayungin Shoal sa West Philippine Sea.
Wala ginsapubliko kun ano kalala nga mga samad ang naangkon sang tatlo ka personnel, apang suno sa militar, gindapatan ang mga ini sang pagbulong samtang sakay sa escort ship sang Philippine Coast Guard (PCG).
Natabo ang insidente sang nagligad nga Sabado, Marso 23, kun sa diin kumpirmado man nga nakaangkon sang seryoso nga halit ang vessel sang Pilipinas nga Unaizah May 4.
Kun madumduman, ang amo man nga sakayan ang ginbombahan sang water cannon sang China Coast Guard (CCG) sang nagligad nga Marso 5 kun sa diin apat man ka Filipino crew members ang nasamaran bangud sa nabuka nga kristal sang vessel.
Suno naman kay Año, ordinaryo lamang nga rotation kag resupply mission ang ginhimo sang Pilipinas nga amo ang pagdul-ong kuntani sang kinahanglanon sang militar didto sa BRP Sierra Madre sa Ayungin Shoal, apang tuman naman kun maka-react ang China.
Kasunod sang hitabo sang nagligad nga Sabado, gindala ang nahalitan nga vessel sa western province sang Palawan.
Nahibaluan nga una nagsiling ang coast guard nga magluwas sa paggamit sang water cannons, nagbalabag kag naghimo sang delikado nga maneuvers ang CCG kag ang Chinese maritime militia vessels agud nga punggan ang resupply mission sa Ayungin Shoal sang weekend.
Nagpasalig man si Año nga indi magpa-intimidate ang Pilipinas kag padayunon gihapon ang pag-resupply sa amo nga area nga sulod pa sa exclusive economic zone sang pungsod.
Una na nga gindepensahan sang CCG ang ila ginhimo nga water cannon attack kun sa diin ila pa ini nga ginlaragway nga “lawful regulation, interception and expulsion” sa barko sang iban nga pungsod nga nagtuyo nga puwersado nga magsulod sa dagat nga sakop sang China.
Lakip naman sa nagsaway sa ginhimo sang China sa sakayan sang Pilipinas amo ang envoys halin sa European Union, Australia, France, Japan kag United States.#
